கடந்த 2021 செப்டம்பர் 7 ஆம் நாள் உடுமலை வரலாற்று ஆய்வு நடுவத்தினரால் நன்றி மலர்களாக வெளியிடப்பட்ட சிறு நூல்
கடந்த 2021 செப்டம்பர் 7 ஆம் நாள் உடுமலை வரலாற்று ஆய்வு நடுவத்தினரால் நன்றி மலர்களாக வெளியிடப்பட்ட சிறு நூல்
நன்றி மலர்களைச் செலுத்துவோம் !
வெறும் வார்த்தைப்புனைவுகளால் அல்லாமல்
நம் எண்ணங்களில் உருவாகும் எழுத்துகளைக்கொண்டு
வெளிக்கொண்டு வந்த
மாண்புமிகு தமிழக முதல்வர் அவர்களுக்கும் !
மாண்புமிகு செய்தித்துறை அமைச்சர் அவர்களுக்கும் !
நாம், நமது உடுமலைப்பேட்டை வரலாற்று ஆய்வு நடுவத்தின்சார்பில்
நன்றி மலர்களைத் தொடுத்து
மாலையாகச் சூடிடுவோம் . . . !
07.09.2021 உடுமலை மண்ணிற்கு விடுதலை கிடைத்திட்ட நாள் ,
வீரத்திற்கும் விளைநிலமாக விளங்கிய தளி எத்தலப்ப மன்னரை உலகம் அறியச்செய்த நாள்.
இது ஏதோ, ஒரு நாள் இரண்டு நாள் அல்ல , இந்த உழைப்பு !
முனைவர் இந்திரசித்து தொடங்கி இருபது ஆண்டுகளுக்கும் மேலான தொடங்கிய தொடர் பயணம் நிறைவுக்கு வந்திருக்கிறது. 1801 ல் நடந்த நிகழ்வு இது நாள் வரையிலும் உடுமலை பகுதி மக்களால் அறிந்து தெரிந்திருந்தாலும், அதை முறையாக அரசின் கவனத்திற்குக் கொண்டு சென்று அரசால் அதற்குண்டான முறையான அறிவிப்பு வரும்போதே, அதன் உண்மைத்தன்மையோடு வெளிப்படும்.
இந்த இருநூற்று இருபது ஆண்டுகால மாக மறைக்கப்பட்ட வரலாற்று நிகழ்வை வெளிக் கொண்டுவரக்காரணமாக இருந்திட்ட வரலாற்று நிகழ்வுகளை, வருடக் கணக்கில் ஆவணப்படுத்தி அதை இரு நூல்களாக வெளியிட்ட பெருமை உடுமலை வரலாற்று ஆய்வு நடுவத்திற்கே சாரும்.
புலவர் ஜல்லிபட்டி பழனிச்சாமி கடந்த 2013 ஆம் ஆண்டு அறிமுகம் ஆனவர், ஆனால் அதற்கு முன்பே 2001 முதல் முனைவர் இ;ந்திரசித்து அவர்களால் களப்பணியில் கோட்டைக்காடு, தூக்கு மரத்தோட்டம், வழக்குச் சொற்களில் படுசாமக்கருப்பன், வீரண்ணன் , வெங்கலமடையாள் என தளி எத்தலப்பர் சார்ந்த வரலாற்றுப் பதிவுகளை தளிப்பகுதியில் சுவடுகளாக, எச்சங்களாக, படிமங்களாகக் காணமுடிந்தது. ஆனால் இதற்கு சரியான சான்றாதாரங்களோ, ஆள்வழித் தரவுகளோ செவி வழிச் செய்திகளோ இல்லை. கால இடைவெளி ஏற்பட்டாலும் தொடர்ச்சியான பணிகளின் காரணமாக 2013 இல் புலவர் பழனிச்சாமியின் அறிமுகம், துணை பலம் பக்க பலமாக உடன் வந்தது.
தளி எத்தலப்பர் குறித்தான தரவுகள், நீர் மேலாண்மை சார்ந்த கல்வெட்டுகள், நாட்டுப்புறக் கதைப்பாடல்கள் என அனைத்து நிலைகளிலும் தரவுகள் கிடைக்க ஆரம்பித்தது. மேலும், சென்னை ஆவணக்காப்பகத்தில் ஆவணங்கள் இருந்தாலும், அங்கு சென்று அதைத் தேடி எடுப்பதற்கு உரிய துறை சார்ந்த , அறிமுகமும், ஆள் வழி உறவுகளும் கிடைத்தது.
2014 முனைவர் க.இந்திரசித்துவால் நாம் பேசிக்கொண்டிருக்காமல் இருக்கும் தரவுகளை வைத்து தளி எத்தலப்ப மன்னர் அறிமுகம் எனும் ஒரு சிறுநூலை அச்சிட்டு வெளிக்கொண்டு வரலாம் என்ற முடிவில் 50 பக்கமே உள்ள தளி எத்தலப்ப மன்னர் - அறிமுகம் என்ற நூலை 20.09.2015 உடுமலை நாராயணகவி, தளி பாளையப்பட்டு எத்தலப்ப மன்னர் என இரு பெரும் அறிமுக விழாவை நடத்தினோம்.
அதில் கல்வெட்டு ஆய்வாளர், அய்யா பூங்குன்றன், திருவாரூர் மத்திய பல்கலைக்கழக தமிழ்துறைப் பேராசிரியர் திரு. ரவி , உடுமலை அரசு கலைக்கல்லூரி தமிழ்த்துறைத்தலைவரும், தற்போதைய திருப்பூர் சிக்கண்ணா அரசு கலை அறிவியல் கல்லூரியின் முதல்வருமான முனைவர். வ. கிருஷ்ணன் , ஆகியோருடன் உடுமலையின் முகாமையான ஆளுமைகள் கலந்து கொண்டனர்.
இதில் சிறப்பு விருந்தினராக தமிழக வாழ்வுரிமைக்கட்சி நிறுவனர் திரு. வேல்முருகன் அவர்கள் கலந்து கொண்டு மிகச்சிறப்பானதொரு உரை நிகழ்த்தி இரு நூல்களையும் வெளியிட்டார். அப்போதுதான் உள்ளூர் மக்களும், ஊடகத்தினரும் தளி எத்தலப்பர் சார்ந்த பதிவுகளும், ஆண்ட்ரோ கேதீசு எனும் ஆங்கிலேயர் தூக்கிலிட்ட நிகழ்வையும் அறியும் வகையில் வெளிக்கொண்டு வரப்பட்டது என்றால் மிகையில்லை.
அதற்கு முன்பு வரை இவ்வாறான நிகழ்வுகள் இந்த மண்ணில் நிகழ்ந்துள்ளது என்பது குறிப்பிட்ட ஒரு ஆய்வாளர்களும் அறிஞர் பெருமக்களுக்கும் மட்டுமே தெரிந்திருந்தது.
ஜல்லிபட்டி பழனிச்சாமி
எங்களது வரலாற்று ஆய்வின் செயல் தளத்திற்குக் கருவியாகவும்; பொருளாகவும் ;; உடுமலை வீர வரலாற்றின் வரலாற்று நாயகர் ; உடுமலை மண்ணின் வீரத்தின் விளைநிலமாகவும் ; உடுமலை வரலாற்றின் உன்னதப்பணியாகவும் ; எங்களது வரலாற்றுக்கனவாகவும் ; இந்த மண்ணில் திட்டமிட்டே மறைக்கப்பட்டு ; இன்று வரையிலும் வெளிவராது ; கண்ணுக்குத் தெரியும் சான்றுகளை வரலாற்றுச்சான்றுகளாகக் கண்ணுற வைத்தவரும் ; வீரத்தின் விளை நிலம் மாவீரன் எத்தலப்ப மன்னரின் வீர வரலாற்றை வெளிக்கொணரும் பெருமுயற்சியில் எங்களுக்கு முதன்மைச்சான்றாகவும் ; ஆள்வழி ஆதாராமாகவும் ; கிடைத்ததற்கரிய மிகப்பெரிய வரலாற்றுப்பெட்டகமாகவும் ; ஆவணங்களை ஆவணப்படுத்தும் வரலாற்று ஆய்வு நடுவத்தின் ஆவணமாகவும் ; எத்தனையோ பணிகள் எல்லாருக்குமிருந்தாலும் ; எனது கடன் எத்தலப்பர் வரலாற்றைப் பணி செய்து கிடப்பதே ; என்று ஒன்றைக் குறிக்கோளுடன் எங்களையெல்லாம் ஆட்டுவித்த, வரலாற்று ஆய்வு நடுவத்தை இயக்குவித்த இயக்குநர் எங்களது பெரும்பாவலர் அய்யா பழனிச்சாமி அவர்களுக்கு முதற்கண் நன்றி,
முனைவர் க.இந்திரசித்து
2016 ல் தன் இறுதி மூச்சுள்ளவரையிலும், உடுமலை வரலாறு தொகுக்கப்பட வேண்டும் என்ற வேணவாவில் வாழ்ந்தவர். தளி எத்தலப்ப மன்னர் என்று குறிப்பிட்டுச் சொல்லத்தக்க அனைத்து சான்றுகளையும் முன்னிறுத்தி, தளி எத்தலப்ப மன்னர் - அறிமுகம் எனும் சிறு நூலை எழுதி வெளியிட்டார். அய்யா அவர்களின் 25 ஆண்டு கால உழைப்பில் இலக்கியம், நாட்டுப்புறவியல் சார்ந்தும், தமிழியல் ஆய்வு சார்ந்தும் 35 க்கும் மேற்பட்ட நூல்களை எழுதியவர். தளி எத்தலப்ப மன்னர் என்ற நூலை எழுதத் துணிந்த போது, நாங்கள் அனைவரும் அவரிடம் கேட்ட கேள்வி, அய்யா, மலையாண்டிவெங்கிடுபதி எத்தலப்ப நாயக்கர் என்று வழங்கப்படுவதை ஏன்? எத்தலப்ப மன்னர் என்று அழைக்கப்படவேண்டும் என்று கேட்டதற்கு, ' தளி எத்தலப்ப மலையாண்டி வெங்கிடுபதி எத்தலப்பநாயக்கர்' என்பவர் தன்னுடைய சாதி சனத்திற்காக வாழ்ந்தவர் அல்ல, மேலும், தன்னுடைய அரசவையில் தன் சாதியைச்சார்ந்த யாரையும் நியமிக்கவில்லை. ஆண்டிமுத்து (கவுண்டர்) என்பவரை தானாதிபதியாக்கி உள்ளார். வீரண்ணன் என்பவரை படைத்தளபதி ஆக்கி உள்ளார். படுசாமக் கருப்பனை ஒற்றனாக நியமித்து உள்ளார். ஆக, அவருடைய ஆட்சியில் அனைத்து சமூக மக்களையும் தம் அரசவையில் ஆளுமைகளாக நியமித்திருந்தார். ஆகவே, அவரை நாயக்கர் எனும் குறுகிய வட்டத்திற்குள் ஆய்வாளர்களாகிய நாம் முன்னிறுத்தக்கூடாது. ஆங்கிலேயர்களை எதிர்த்து போரிட்டது மட்டுமல்லாமல், ஒரு ஆங்கிலேய அதிகாரியைத் தூக்கிலிடும் அளவிற்கு அவருக்கு மக்கள் ஆதரவும் ஒத்துழைப்பும் இருந்ததை நாம் எண்ணிப்பார்க்க வேண்டும்' எனவும் குறிப்பிட்டார். மேலும் 2015 தளி எத்தலப்ப மன்னர் எனும் நூல் அறிமுகவிழாவில் இது குறித்து விரிவான விளக்கத்தையும் தந்தார். ஆகவேதான் அதற்குப்பிறகு அவரை தளி எத்தலப்ப மன்னர் என்று அழைக்கப்பட்டார்.
முனைவர் மா.மதியழகன்
இந்த நிகழ்வுகளைத் தொடர்ச்சியாக இருக்கும் வகையில் வழிமொழிந்து உறுதிப்படுத்தும் வகையில் வரலாற்றுத் துறைப்பேராசிரியர் முனைவர் மா. மதியழகனின் ஆய்வுப்பணிகள் தொடர்ந்து சுமார் மூன்றாண்டு காலம் ஆவணக்காப்பகம், அருங்காட்சியகம் என ஆவணங்களைத் தேடித்தேடி ஆவணப்படுத்தும் வகையில் முனைவர் மதியழகனின் உழைப்பு, மேலும், உத்வேகத்தையும் உற்சாகத்தையும் அளித்தது. சென்னை ஆவணக் காப்பகத்தின் இருக்கும் வருவாய் ஆவணங்களும், (Revenue Documents) ராணுவத்துறை ஆவணங்களும் (Military Documents) பெருமளவில் உதவியாக இருந்தது. இதையே ஆவணமாக்கி தென்கொங்கு நாட்டின் முதல் விடுதலைப்போர் எனும் நூலினை முனைவர் மா. மதியழகன் அவர்கள் கடுமையான மன உளைச்சலில் உருவாக்கினார். அதை நூலாக்கி வெளிக்கொணர அப்போதைய மாவட்ட வருவாய் அலுவலர் திரு. பிரசன்னராமசாமி, குறிச்சிக்கோட்டை வருவாய் ஆய்வாளர் திரு. விஷ்ணுகண்ணன், மாவட்ட வருவாய் அலுவலர் உதவியாளர் திரு. சபரி ஆகியோரும் மிகப்பெரிய அளவில் உதவியாக இருந்தனர்.
இதைக்கடந்த 2018 மே 19 சனிக்கிழமை யன்று உடுமலையில் ஆயிரக்கணக்கான மக்களில் முன்னிலையில் அப்போதைய செய்தித்துறை அமைச்சர் மற்றும் கால்நடைதுறை அமைச்சர் அவர்களால் வெளியிடப்பெற்றது. அன்று மணி மண்டபம் கண்டிப்பாக கட்டப்பெறும் என்ற உறுதியும் அப்போதைய அமைச்சர்களால் வழங்கப்பெற்றது. ஆனால் அது ஆட்சி முடியும் வரை எவ்வளவோ முயன்றும் முடியவில்லை.
மடத்துக்குளம் சட்டமன்ற உறுப்பினர் ஜெயராமகிருஷ்ணன்
மதிப்பிற்கும் மரியாதைக்கும் உரிய ஏழைப்பங்காளன், முன்னாள் மடத்துக்குளம் சட்டமன்ற உறுப்பினர் கடந்த 2018 சூன் 25 ஆம் நாள் தமிழக சட்டமன்றத்தில் முதன் முதலாக தளி எத்தலப்ப மன்னருக்கு மணி மண்டபம் அமைப்பதற்கு குரல் கொடுத்த முதல்வன், எனும் வகையிலும் தென்கொங்கு நாட்டின் முதல் விடுதலைப் போர் எனும் நூலுக்கு நூலக அங்கீகாரம் பெறும் வகையில் சட்டமன்றத்தின் குரல் கொடுத்தவரும் இவர்தான். எனவே, தளி எத்தலப்பருக்காக அரங்கும் திருஉருவச்சிலையும் அமைப்பதற்கு கடந்த ஆட்சியிலேயே குரல் கொடுத்த பெருமைக்குரியவர் ஜெ.ஆர். கே. எனும் ஜெயராமகிருஷ்ணன். மீண்டும் 2019 பிப்ரவரி 13 ஆம் நாள் தென்கொங்கு நாட்டின் முதல் விடுதலைப்போர் எனும் நூல் நூலக அங்கீகாரம் வழங்கப்பட்டும் நூலக உத்திரவு வரப்பெறவில்லை என்பதை மீண்டும் பதிவு செய்தார். அதன் பிறகும் பல முறை முயற்சி செய்தும் நூலுக்கான அங்கீகாரம் கிடைக்கப்பெறவில்லை.
பொள்ளாச்சி பாராளுமன்ற உறுப்பினர் கு.சண்முகசுந்தரம்
வரலாற்று ஆய்வாளர், பொறிஞர் கு.சண்முகசுந்தரம் கடந்த டிசம்பர் 2019 முதலே உடுமலை வரலாற்று ஆய்வு நடுவத்தின் பணிகளை கூர்ந்து கவனித்து வந்தாலும், உடுமலை வரலாறு நூல் வெளியீட்டு நிகழ்வையும், உடுமலை வரலாறு நூலினையும் மிகவும் அர்ப்பணிப்பு உணர்வுடன் கவனித்து அடுத்த கட்டப்பணிகளைக் கொண்டு சொல்லக்காரணமாக இருந்திட்டார். அவரிடம் தளி எத்தலப்பர் குறித்தான தரவுகளைத் தெரிவித்தது முதல் அனைத்து ஆவணங்களையும் வாங்கிப் படித்துப்பார்த்து , இனிமேல் இந்தப் பணிகளை என்னிடம் விட்டுவிடுங்கள் என்று சொல்லி, ஆட்சி மாற்றம் அமைந்தால் தளி எத்தலப்பர் மணிமண்டபம் கட்டாயம் அமைக்கப்படும் எனும் இனிப்பான செய்திகளுடன் தனது பணிகளை உரியவாறு செய்திட்டார்.
மே மாதம் ஆட்சி மாற்றம் வந்தவுடன் அவர் சொன்ன முதல் தகவலே, உங்களுக்கான மணி மண்டபக் கோரிக்கை உறுதியாக நிறைவேறும். அதற்குண்டான அடிப்படைப்பணிகள் நடைபெற்று வருகிறது என்று கூறினார். அது முதல் அறிவிப்பு வரும் வரையிலும், அறிவிப்பு வந்த பிறகு அதற்குண்டான பணிகளில் இன்று வரையிலும், இனிமேலும் துணை நிற்பார். உடுமலை வரலாற்று ஆய்வு நடுவத்தின் பணிகளைப் பார்த்து, அதில் தன்னையும் இணைத்துக்கு கொண்டு பாடாற்றும் நல்லுள்ளம் கொண்ட பாராளுமன்ற உறுப்பினரை எப்படி, என்ன சொல்லி நன்றி கூறுவது. அவரின் பணிகள் அனைத்தும் வரலாற்று ஆய்வு நடுவத்தின் பணிகளே. இன்னும் உடுமலை சார்ந்த வரலாற்றுப்பணிகளை அவரே முன்னெடுத்துச் சென்று செய்து தர வேண்டும்.
திரு. தி.குமாரராஜா தலைவர், உடுமலை வரலாற்று ஆய்வு நடுவம்
நான் ஜிலோப்பநாயக்கன்பாளையத்தில் பிறந்தவன். இதை வழக்கில் செலவநாயக்கன்பட்டி எனும் அழைப்பர். எனது ஊரின் தெற்குக் கோடியில் கற்சிற்பங்கள், நடுகற்கள் சில இருக்கின்றன. நான் சிறுவயதில் அங்கு சென்று என்நண்பர்களுடன் விளையாடியிருக்கிறேன். என் தாத்தா திருமூர்த்தி அந்த ஊரின் கர்ணமாக இருந்தவர். அவரிடம் இது குறித்துக்கேட்ட போது இது இந்த ஊர்ல வாழ்ந்த பெரிய மகாராசன் சண்டை போட்ட இறந்த இடம் எனக்கூறினார்.
அதற்குப்பிறகு என் விவரம் தெரிந்த நாள் முதல் இந்த வரலாற்றை அறிந்த போது எனது ஊருக்குத் தெற்கில் தளிப்பகுதியில் ஒரு பாளையக்காரராக இருந்ததையும் அவர் மக்களுக்கு நல்லது செய்யும் வகையில் ஆட்சி செய்தார் எனவும் ஆங்கிலேயனைத் தூக்கிலிட்ட பகுதி திணைக்குளத்தில் இருப்பதை அறிந்து தெரிந்து கொண்டேன்.
பிற்பாடு முனைவர் க. இந்திரசித்து அவர்களின் தளி எத்தலப்ப மன்னர் அறிமுகம் நூலினையும், முனைவர் மா. மதியழகன் எழுதிய தென் கொங்கு நாட்டின் முதல் விடுதலைப் போர் நூலினையும் படித்தறிந்த பிறகு தளி எத்தலப்பர் செய்த அரும்பெரும் செயல்களைத் தெரிந்து கொண்டேன்.
மேலும் என்னுடைய தாத்தா திருமூர்த்தி அவர்கள் திருமூர்த்தி மலையில் உள்ள அமணலிங்கேஸ்வரர் திருத்தலத்தின் முன்பு ஒரு தீபத்துணை அமைத்த போது அதில் கார்த்திகைப் பெருந்தீபத்தன்று எனது ஊரின் கம்பளத்து சமூக மக்கள் எண்ணெய் கொண்டு சென்று அதில் ஊற்றி தீபமேற்றி வழிபட்டு வருவதையும், அது தளி எத்தலப்ப மன்னருக்காகச் செய்யப்படுகிறது என்பதையும் பிற்பாடு அறிந்துகொண்டேன்.
80 வயதிற்கும் மேலான எனக்கு என்னுடைய சொந்த மண்ணில் ஒரு ஆங்கிலேயனைத் தூக்கிலிட்ட ஒரு தமிழ் மன்னனுக்கு தமிழக அரசின் சார்பில் மணி மண்டபம் திருவுருவச்சிலை அமைப்பது எவ்வளவு பெரிய விசயம்.
இந்த மணிமண்டபம், திருவுருவச்சிலை அமைக்க நடவடிக்கை எடுத்திட்ட அனைவருக்கும். குறிப்பாக பொள்ளாச்சிநாடாளுமன்ற உறுப்பினர் கு.சண்முகசுந்தரம், காந்தி கலா நிலையம் எனும் நான் படித்த பள்ளியில் படித்த மடத்துக்குளம் முன்னாள் சட்டமன்ற உறுப்பினர் இரா. ஜெயராமகிருஷ்ணன், உடுமலை மத்தீன் அவர்களுக்கும் எனது சார்பில் எங்களது வரலாற்று ஆய்வு நடுவத்தின் சார்பில் நன்றி மலர்களைச் சூடிடுவோம்.
செயர்கரிய செய்வார் பெரியார் எனும் சொல்லிற்கேற்ப மிகப்பெரிய பணிகளைச் செய்திட்ட தமிழக முதல்வர் முத்துவேல் கருணாநிதி ஸ்டாலின் அவர்களுக்கும். செய்தித்துறை அமைச்சர் மு.பெ. சாமிநாதன் அவர்களுக்கும் நன்றிகளைத் தெரிவித்துக்கொள்கிறேன்.
நன்றி மலர்களைச் சூடிடுவோம்
நல்லாசிரியர் வை.விஜயலட்சுமி
பாரதியார் நூற்றாண்டு அரசு பெண்கள் மேல்நிலைப்பள்ளி
உடுமலைப்பேட்டை
நான் புவியியல் பட்டதாரி ஆசிரியராக இருந்தாலும், என்னிடம் பயிலும் அனைத்து மாணவிகளுக்கு பாடம் சார்ந்த அனைத்து செய்திகளையும் சொல்லித் தருவேன். மேலும், பாடம் தவிர்த்து சமூகச் செயல்பாடுகளிலும் என்னை நான் ஈடுபடுத்திக் கொள்வதால் இயல்பாக நாம் வாழும் மண்ணின் மீதும், மக்களின் மீதும் எனக்கு உள்ள அக்கறை பாசமாகவே உடுவெடுத்து விட்டது.
அந்த வகையில் உடுமலை பகுதியில் நடக்கும் அனைத்து நிகழ்வுகளிலும் என்னுடைய குழந்தைகள் என்னிடம் பயிலும் அனைத்து மாணவிகளையும் அரசு மற்றும் அரசு சார்ந்த பொது நிகழ்வுகளில் கலை இலக்கிய நிகழ்வுகளைக் கட்டாயம் பங்கு பெறச்செய்வேன்.
அவ்வாறே, உடுமலை வரலாற்று ஆய்வு நடுவத்தின் நண்பர்களோடு ஐந்தாறு முறை திருமூர்த்தி மலை, தளி எத்தலப்ப மன்னரின் வாரிசுகளாகக் கருதப்படும் காண்டூர் கால்வாய் அருகில் இருக்கும் புடைப்புச் சிற்பங்கள் நமக்கு உண்மைகளைத் தெரிவிக்கும் வகையில் உருவங்களாக நிற்கின்றனர்.
இதற்காகப் பல முறை ஊடகத்தில் தளி எத்தலப்ப மன்னருக்கு மணி மண்டபம் அமைக்கப்பெற வேண்டும் என்பதை பதிவு செய்துள்ளேன். இறுதியாக கடந்த ஆகஸ்ட் 15 விடுதலை நாள் நிகழ்வுக்கு முன்பு வரையிலும் இதற்காகத் தொடர்ந்து குரல் கொடுத்து வருகிறேன். மேலும், கடந்த மாதம் கோயிவ்பட்டி அரசு கலைக்கல்லூரியின் தமிழ்த்துறையுடன் உடுமலை அரசு கலைக்கல்லூரி வரலாற்றுத் துறை இணைந்து நடத்திய பன்னாட்டுக் கருத்தரங்கிலும் இந்த செய்திகளைப் பதிவு செய்தேன்.
அந்த வகையில் வரலாற்று ஆய்வாளர்களாகிய எங்களுக்கு இது போன்ற வரலாற்று ரீதியான அறிவிப்புகள் நம் மண்ணில் மறைந்துள்ள வீர வரலாறுகள் வெளிக்கொணரவும், எம் போன்ற வரலாற்று ஆய்வாளர்களுக்கு ஊக்கமளிக்கும் செயலாகவே இது இருக்கும்.
இந்த அறிவிப்பு வரக்காரணமாக இருந்திட்ட மாண்புமிகு தமிழக முதல்வர் அவர்களுக்கும், மாண்புமிகு செய்தித்துறை அமைச்சர் அவர்களுக்கும், மடத்துக்குளம் முன்னாள் சட்டமன்ற உறுப்பினர் இரா. ஜெயராமகிருஷ்ணன் அவர்களுக்கும், மேலும் கடந்த ஆட்சிக்காலங்களில் இதற்காக முன் முயற்சி எடுத்திட்ட நல் நெஞ்சங்களுக்கும் எங்களுடைய வரலாற்று ஆய்வு நடுவத்தின் சார்பில் வரலாறுகளை மக்களிடம் கொண்டு சேர்க்கும் ஆசிரியர் எனும் வகையிலும் மிகப்பெருமிதத்தோடு நன்றிகளை மலர்களை அனைவருக்கும் சூடிடுவோம்.
பின் இணைப்பு
பாளையக்காரர் வரலாறு The poligar history
கோயமுத்தூர் நாட்டு பாளையக்காரர் எத்தலப்ப நாயக்கர் பற்றிய குறிப்புகள்
தொட்டிய கம்பாள சாதி கட்சான பொம்ம நாயக்கர். டீல்லி பாதுஷாவின் பேரரசு ஆட்சியின் கீழிருந்த குறிச்சிபாளையத்தை ஆண்டு வந்தார். டெல்லி பாதுஷா இவரது குடும்பப் பெண்களை திருமணம் செய்து கொள்ள விரும்பியதை ஏற்காத இவர் தனது சாதி மக்கள் மற்றும் குடும்பத்துடன் விஜயநகரத்திற்கும் இடம் பெயர்ந்தார். அவருக்கு விசயநகர மன்னர் ஒரு கிராமத்தை இனமாகக் கொடுத்தார். ஒரு எத்தல முத்தல நாயக்கர் குடும்பம் தென்வடலாக நான்கு காதம், கிழமேலாக இரண்டறை காதம் அளவுள்ள காட்டுப்பகுதியை புணரமைத்தனர். இது ஆனைமலைப் பகுதியில் அருகில் வரகிரி மலைச்சரிவில் இருந்தது. இவர் மதுரை எல்லைக்கும், மலையாள நாட்டிற்கும் ஒரு பாதை அமைத்தார்.
இவர் மும்மூர்த்திகளின் சிலைகளை மீட்டெடுத்து (பிரம்மா, விஷ்ணு, மகேஷ்வரா) விநாயகா, பத்ரகாளி மற்றும் வெங்கடாசலபதி ஆகியோருக்கும் வழிபாட்டை ஏற்படுத்தினார். இக்கிராமத்திற்கு அம்பாசமுத்திரம் என்று பெயரிட்டார். இதிலிருந்து வடக்கே ஒரு காத தூரத்திற்கும் அப்பால் இவர் குடியிருப்பதற்காக குறிஞ்சேரி என்ற கிராமத்தை உருவாக்கினார். இவருக்கு கிருஷ்ணதேவராயர் மும் முடிப்பட்டத்தை வழங்கி பெருமைப்படுத்தி ஒரு பாளையப்பட்டு நிலத்தையும் வழங்கினார். மேலும், 32 அமரக்காரர்களையும் இவருக்கு பணியாளர்களாக நியமித்து கௌரவப்படுத்தினார்.
இம்முடி எத்தல முத்தல நாயக்கர் முதல் பதினாறு பாளையக்காரர்கள் நானூற்று ஐம்பத்தி ஐந்து 455 ஆண்டுகள் ஆட்சி புரிந்தனர். முதல் பாளையக்காரர் கைர நதியின் குறுக்கே ஒரு அணை கட்டியதாகச் சொல்லப்படுகிறது. 32 அமரக்காரர்களுக்கும், 32 கிராமங்களும் 19 சிறிய கிராமங்களும் இருந்தன. இந்தப் பெரு நிலம் நான்காவது பாளையக்காரர் தலைமுறையில் அவருக்கும் அவரது சகோதரருக்குமிடையே பாகம் பிரிக்கப்பட்டது. அவரது சகோதரரே ஜல்லிபட்டி பாளையக்காரர் என அழைக்கப்பட்டார் . 5 ஆவது தலைமுறையிலும் பாளையக்காரரின் சகோதரர் ஜல்லிபட்டி பாளையக்கார் ஆனார். 5 ஆவது தலைமுறை பாளையக்காரர் திருமலைநாயக்கர் முன் குதிரையேற்றத் திறனைக் காட்டிப் பரிசாக ஆண்டுக்கு 100 பொற்காசுகள் பெற்றார்.
6 ஆவது பாளையக்காரர் ரங்கராஜா முத்து வீரப்ப நாயக்கர் தளியில் ஒரு கோட்டையைக்கட்டி 10,000 காலாட்படை, 8.000 வில் வீரர்கள். மற்றும் சில யானைகள் அடங்கிய படையையும் வைத்திருந்தார். 11 ஆவது பாளையக்காரர் மற்றும் 17 பாளையங்களும் மைசூரின் சாம்ராஜ் உடையாரின் ஆட்சியின் கீழ் வந்தது. இது மலையடிவாரத்தில் இருந்தது.
இவர் 1000 பகோடாவை ராஜகோபால் கப்பமாகக் கட்டினார். இவர் தாராபுரம் போரில் பங்கு பெற்றதால் பரிசாக மைசூரில் குமாரநந்தம் என்ற பட்டம் பெற்றார். 12 ஆவது பாளையக்காரர் மைசூர் மகாராஜாவின் கோயமுத்தூர் கோட்டைக் காவலாளியாக சிக்கராஜா உடையாரால் நியமிக்கப்பட்டார். படைக்காவல் வழி வசூலிக்கும் உரிமையும் இவருக்கு வழங்கப்பட்டது. 13 ஆவது பாளையக்காரர் ஹைதர் அலியின் உத்தரவிற்கிணங்க மலையாள சீமையின் மாங்கரை லக்காணி கோட்டை நாயர்களுக்கு எதிரான போரில் அமின்சாகிப்பிற்கு உதவியதால் 2500 பொன் மானியமாகப் பெற்றார். 15 ஆவது பாளையக்காரர் வெங்கடபதி எத்தலப்ப நாயக்கர் காலத்தில் பழனி வேலாயுத நாயக்கரின் பாளையப்பட்டுவை ரங்கசாமி நாயக்கர் கைப்பற்றினார். இவர் பாளையப்பட்டின் உள்பகுதிகளுக்கு ரோடுகளை அமைத்து சில பாளையப்பட்டுகளைக் கைப்பற்றி அவைகளில் சில வழிபாடும் செய்து வந்தார்.
திப்பு சுல்தான் கப்பம் கட்டாத இவர் மீது நடவடிக்கை எடுத்த தனது தளபதி சர்க்கார் நாரா சாகிப்பற்கு உதவுமாறு தளி பாளையக்காரரருக்கு உத்தரவிட்டார். இருவருமாகசேர்ந்து பேரரிட்டு வேலயாயுத நாயக்;கரை மீண்டும் பழனி பழைய பாளையக்காரர்களாக நியமித்தாரர்கள்.
கோயமுத்தூரில் சர்வாதிகார திம்மைய கவுண்டன், எல்லா பாளையக்காரர்களையும் துன்புறுத்தி ஆட்சியை ஏற்றக்கொள்ள ஆணையிட்டார். தளி பாளைக்காரர் ஏற்க மறுத்ததால் திம்மைய கவுண்டர் அந்தப் புகுதியை ஆக்கிரமித்தான். தளி பாளையக்காரர் ஆனைமலை காட்டுக்குள் தப்பித்துச் சென்றுவிட்டார் ஆனாலும் ஏரப்பன் என்பவரின் சூழ்ச்சியால் திம்மைய கவுண்டன் அவரைப்பிடித்தான். அவர் சொத்துகள் முழுவதும் பறிமுதல் செய்யப்பட்டது.
இதற்குப்பின்னால் 16 ஆவது பாளையக்காரரின் பாட்டியான ஆண்டியம்மாள் கோயமுத்தூர் கிழக்கிந்தியக் கம்பெனியின் ஜெனரல் மீடோஷ் என்பவரின் ஆதரவில் பாளையத்தையும் இழந்த சொத்துக்களையும் மீட்டெடுத்தாள். இவர் கம்பெனிக்கு 2500 பொன் கப்பமாக செலுத்த வேண்டும் என்று நிர்ணயிக்கப்பட்டது.
இந்தப் பாளையம் மீண்டும் சில காலம் திப்பு சுல்தான் கைகளுக்குப் போனது. கடைசியாக கம்பெனியின் ஆட்சிக்குக் கொண்டுவரப்பட்டு வருடத்திற்கு ஏழாயிரம் பொன் கப்பமாக நிர்ணயிக்கப் பட்டது. இந்தப் பெருந்தொகையை பாளையக்காரர் செலுத்த இயலாததால் கிழக்கிந்தியக் கம்பெனி தன் வசம் எடுத்துக்கொண்டது.
தமிழில் இந்தக் குறிப்புளை எழுதி வைத்துள்ள மலையாண்டி எத்துலப்ப நாயக்கர் 17ஆவது பாளையக்காரர் ஆவார். அவருக்கு அப்பொழுது வயது 8 ஆகும். இவர் கம்பெனியின் பாதுகாப்பில் இருந்து வந்தார்.
#உடுமலை_வரலாறு 09.10.2024
Comments
Post a Comment